Icona calendario 05-06-2025
Iconaalert 08:30-14:30
Icona ubicación Praza Maior, 32005 Ourense

Anterior

Listaxe

Seguinte
#Institucional

O Concello agrupará servizos en La Molinera para concentrar procesos, eliminar redundancias, gañar en eficiencia e evitar “reinos de taifas”

31 de maio de 2025 - 12:42

O alcalde Gonzalo Jácome avanza que durante este verán trasladarase a este espazo a maior parte de varios departamentos do Concello / “Queremos concentrar servizos: a filosofía de outrora de facer recunchos e ter edificios repartidos pola cidade non é funcional”, sostén o rexedor

O Concello de Ourense concentrará departamentos municipais burocráticos nas instalacións de La Molinera, coa finalidade de dar uso a este espazo, concentrar nel procesos e servizos, eliminar redundancias e evitar “reinos de taifas”. Así o avanzou esta mañá o alcalde, Gonzalo Pérez Jácome, quen adiantou que o traslado de servizos a este emprazamento desenvolverase durante o período estival, comezando no mes de xullo.

Nas instalacións de La Molinera, acondicionadas hai 10 anos, traballan actualmente 7 enxeñeiros de programación que, entre outras funcións, están a crear aplicacións para o Concello, a través dun programa provisional. 

O alcalde adiantou que La Molinera acollerá a maior parte (non toda) de diferentes servizos municipais como os de Educación, Termalismo, Persoal, Festexos, Servizos Xerais, Igualdade, Saúde, Promoción económica ou Tesourería, entre outros. O Concello realizou traballos nos últimos meses para acondicionar e equipar espazos no edificio municipal para que poida acoller estes servizos.

“Basicamente o que queremos facer é concentrar moitos servizos en La Molinera, darlle uso a unha infraestrutura que se fixo fiel á filosofía de outrora de facer reinos de taifas con pequenos recunchos e edificios repartidos por toda a cidade. Esta estrutura non é funcional”, afirma Gonzalo Jácome, quen explica que “este é tamén un dos motivos polos que renunciamos a seguir co proxecto de rehabilitación dun edificio na Praza da Trindade, a carón do Servizo de Urbanismo. Non queremos máis recunchos nin reinos de taifas. No caso de que fagamos algo sería un gran edificio administrativo municipal”, asegura

Explica o alcalde que La Molinera “usouse como unha pseudo academia de cursos de iniciación na época de Jesús Vázquez (2015-19), e foi proposto polo noso grupo de goberno para albergar a Axencia Española de Supervisión de Intelixencia Artificial (Aesia), aínda que finalmente o Goberno de España e a Xunta de Galicia optaron pola cidade da Coruña. Foi un proxecto errado porque a Xunta e o Estado español non investiron en intelixencia artificial”, conclúe. Agora, detalla Pérez Jácome, “temos que darlle o mellor uso posible, e este é concentrar servizos para non ter departamentos redundantes. Queremos conseguir a vella aspiración que temos desde o noso grupo de goberno que é centralizar os procesos, e que un departamento se encargue de todas as facturas do Concello e non que cada concellería teña os seus propios contables para as facturas”, conclúe.