Policía Local e centros educativos reúnense para atallar as aglomeracións de tráfico nos horarios de entrada e de saída dos colexios

A Concellería de Tráfico e de seguridade Cidadá convocou esta mañá os centros educativos da cidade nas instalacións da Policía Local, na rúa Victoria Kent, para abordar os problemas de tráfico que se producen á entrada e á saída dos escolares.

Á reunión asistiron directores e representantes de Anpas, por un lado, os responsables da concellería de Educación, polo outro, e o concelleiro de Seguridade Cidadá, Telmo Ucha, e representantes da Policía Local, a intendente-xefa e o inspector principal

Durante o encontro acordouse estudar as propostas dos centros de ensino -que achegarán nos vindeiros 15 días- coa fin de coñecer a casuística diversa de cada caso concreto e as propostas para solucionalo. Con estes datos elaborarase un estudo pormenorizado, no que se incluirán solucións efectivas para evitar as aglomeracións, coa intención de poñer en marcha un plan específico logo das vacacións de Nadal.