O Concello pon en marcha 25 actuacións de mellora de infraestruturas no rural da cidade

A Concellería de Infraestruturas mobilizou 25 proxectos no rural da cidade de Ourense logo da aprobación da modificación orzamentaria proposta polo alcalde de Ourense, Gonzalo Pérez Jácome. Cun investimento aproximado de 700.000 euros, comezarán nos vindeiros días traballos de asfaltado, reparación de camiños, muros de contención e acondicionamento de accesos.

As obras executaranse entre finais deste ano 2021 e principios do 2022, dándolle continuidade á liña de actuación de investimento en infraestruturas no rural que o Concello está a realizar nos últimos tempos. Neste sentido, está previsto seguir realizando obras de mellora durante os anos 2022 e 2023 na procura de satisfacer as necesidades da veciñanza que habita nestes núcleos.