Responsive image 15-08-2022
Responsive image 988 388 100
Responsive image 09:00-14:00
Responsive image Praza Maior, 32005 Ourense

O alcalde fixa nun 45% os servizos mínimos ante a convocatoria de folga na limpeza e a recollida de lixo

8 de decembro de 2021 - 16:20

Gonzalo Jácome require as forzas da orde para que garantan o dereito ao traballo e valora recurrir a Tragsa ou solicitar a intervención do exército se fose preciso, dada a pandemia / “Seguimos a manter reunións coas partes e non cederemos a presións cando o único que ambicionan ambos os bandos é incrementar os seus ingresos á conta do erario público”, asegura o rexedor.


Imagen de noticia

Ante a convocatoria de folga inmediata e indefinida por parte dos traballadores da empresa concesionaria do servizo de limpeza e recollida de residuos en Ourense, o alcalde, Gonzalo Pérez Jácome, asinou no día de onte os servizos mínimos, que serán dun 45% do persoal actual (máis o 55% restante que non se sume á folga). Tamén requiriu as forzas da orde para garantir o dereito ao traballo, e que os piquetes de folga sexan soamente informativos.

O alcalde informa tamén que, en caso de necesidade, podería solicitarse a colaboración da empresa pública TRAGSA e que, no caso de que se prolongase a folga, estando en pandemia e baixo riscos en materia de salubridade, o Concello de Ourense solicitaría a intervención do exército, coa súa Unidade Militar de Emerxencia.

Adianta tamén o rexedor ourensán que á empresa concesionara do servizo descontaránselle na factura todos os servizos que non sexa capaz de prestar á cidade durante a folga.

Pérez Jácome informa tamén que “seguimos a manter reunións coas partes e que non cederemos a presións cando o único que ambicionan ambos os bandos non é xa manter a súa actividade laboral, senón simple e sinxelamente incrementar os seus ingresos á conta do erario público”.

Subliña a este respecto que a concesión de servizo está a piques de caducar, “e calquera incremento hoxe, podería hipotecar os orzamentos municipais, que deben renovar o seu contrato de limpeza en 2022”.