Moción do Grupo Municipal de Ciudadanos relativa ás bonificacións de impostos municipais por puntos de recarga eléctrica

Exposición de motivos:

A modificación da Lei de Facendas Locais pola Real Decreto-lei 29/2021, do 21 de decembro, polo que se adoptan medidas urxentes no ámbito enerxético para o fomento da mobilidade eléctrica, o autoconsumo e o despregamento de enerxías renovables, permite que, desde o inicio deste ano, os concellos teñan a posibilidade de que as ordenanzas locais bonifiquen ata o 50% da cota íntegra do imposto sobre bens inmobles (IBI) para aqueles activos nos que se instalen puntos de recarga para vehículos eléctricos e que estará condicionada a que as instalacións dispoñan da correspondente homologación pola administración competente.

Con esta nova normativa, os concellos poden realizar bonificacións fiscais que estimulen a creación de novos puntos de recarga eléctrica. Ademais, da bonificación do 50% na cota do IBI, contémplase unha rebaixa de ata o 50% do imposto de actividades económicas (IAE) para os suxeitos pasivos que tributen por cota municipal e fosen instalados puntos de recarga para vehículos eléctricos nos locais afectos á actividade económica.

De igual maneira, prevese unha exención de ata o 90 % no Imposto sobre Construcións, Instalacións e Obras (ICIO) naqueles inmobles en que leven a cabo obras ou reformas necesarias para a instalación de puntos de recarga para vehículos eléctricos.

Estas medidas, incorporadas na Real Decreto-lei 29/2021, poden contribuír a impulsar o desenvolvemento e cumprimento dos obxectivos específicos previstos no Plan de Mobilidade Urbana Sostible de Ourense, no que respecta a actuacións ambientais e calidade do aire, mellorar a seguridade viaria coa renovación do parque móbil, con novos modelos híbridos e eléctricos que incorporan as últimas tecnoloxías en materia de seguridade viaria activa e pasiva, e pacificación do tráfico rodado.

Desde Ciudadanos cremos que non debemos deixar pasar esta oportunidade para incluír as devanditas bonificacións na Ordenanza Local para o fomento da mobilidade da cidade e tamén para alixeirar as cargas fiscais que soportan os veciños de Ourense nuns momentos economicamente complexos.

Proposta para a súa aprobación:

1.- Instar ao Goberno local a modificar a Ordenanza Fiscal para incluír as bonificacións no IBI, o imposto sobre actividades económicas e o ICIO (construción e obras) nos casos nos que as vivendas e/ou locais aposten polas enerxías renovables.

O Pleno do Concello, por 12 votos a favor do Grupo Municipal do PSdeG-PSOE, do Grupo Municipal de Ciudadanos e de dona María Teresa Rodriguez Garrido e dona María del Mar Fernández Dibuja, concelleiras non adscritas; 14 abstencións do Grupo Municipal do Partido Popular, do Grupo Municipal de Democracia Ourensana, do Grupo Municipal do BNG e de don Laureano Bermejo Ansia, concelleiro non adscrito; adoptou o seguinte ACORDO: Aprobar a moción.

30/03/2022: Remitido acordo plenario a dona Ana Fernández Morenza. Recibido aviso de recepción o. 

Documentos para descargar: